Në maj, guvernatori i Floridas, Ron DeSantis nënshkroi një projekt-ligj që ndalon bizneset, shkollat dhe njësitë qeveritare të kërkojnë dokumentacionin e vaksinimit kundër COVID-19.
Bizneset, shkollat dhe njësitë qeveritare në Florida që kërkojnë nga njerëzit të tregojnë dëshmi të vaksinimit kundër COVID-19 së shpejti do të përballen me një gjobë të rëndë, sipas një ligji të ri nga Departamenti i Shëndetit i shtetit, transmeton UBT News.
Ligji i cili u finalizua të premten dhe hyn në fuqi më 16 shtator, thotë se atyre që kërkojnë nga klientët ose anëtarët që të sigurojnë dokumentacionin e vaksinimit do t’u jepet një “gjobë 5,000 dollarë për shkelje individuale dhe të veçanta”.
“Ky legjislacion siguron që të ketë garanci ligjore në mënyrë që qeveritë vendore të mos mbyllin arbitrarisht shkollat ose bizneset tona”, tha ligjvënësi republikan, 42 vjeç, në një deklaratë në atë kohë.
“Në Florida, zgjedhja juaj personale në lidhje me vaksinimet do të mbrohet dhe asnjë biznes apo njësi qeveritare nuk do të jetë në gjendje t’ju mohojë shërbimet bazuar në vendimin tuaj”.
Përveç ndalimit të vaksinimeve të COVID-19 në shkolla, DeSantis nënshkroi një urdhër ekzekutiv muajin e kaluar duke ndaluar bordet e shkollave të zbatojnë mandatet e maskave në vitin e ri akademik.
Ai që atëherë ka kërcënuar se nuk do t’i paguajë punonjësit e distriktit shkollor të cilët nuk i binden politikës së përditësuar, përcjell UBT News.
Numrat e COVID-19 janë rritur në të gjithë Shtetet e Bashkuara për shkak të variantit shumë të transmetueshëm Delta, i cili tani është lloji më i zakonshëm në vend. Individët e pavaksinuar përbëjnë shumicën më të madhe të rasteve të reja dhe shtrimeve në spital.
Që nga e mërkura, 52.6 përqind (174.6 milion) e popullsisë së Shteteve të Bashkuara janë plotësisht të vaksinuar kundër COVID-19, sipas të dhënave nga CDC, ndërsa 61.9 përqind (205.5 milion) kanë marrë të paktën një dozë./UBTNews