Të ushqyerit me vakte të rregullta është dieta ideale për çdo organizëm. Mjekët dietologë i japin një rëndësi të veçantë vaktit të mëngjesit. Kjo pasi mëngjesi është vakti i parë i ditës dhe duke qenë i tillë kaloritë e marra në të janë rezervat e organizmit për një ditë aktive. Për këtë arsye mëngjesi duhet të jetë vakti kryesor i ditës si për ju ashtu dhe për fëmijët tuaj.
Studimi i Institutit të Shëndetit Publik sjell shifra jo fort të kënaqshme për traditën shqiptare në ketë drejtim, pasi sipas tij vetëm 44 për qind e fëmijëve që ndjekin shkollën, konsumojnë mëngjes çdo ditë të javës. Gjysma nuk hanë mëngjes çdo ditë dhe 6.7 për qind nuk konsumojnë mëngjes pothuajse asnjëherë.
Specialistët theksojnë se pasojat për fëmijët që nuk hanë mëngjes janë të mëdha. Ata lodhen më shpejt si rezultat i mungesës së lëndëve ushqimore dhe energjive dhe po ashtu tregohen më pak krijues dhe të vëmendshëm gjate mësimit në klasë.
Kështu barra bie mbi prindërit që të krijojnë një traditë familjare te ngrënies së mëngjesit. Uluni të gjithë rreth tryezës për të paktën 20-30 minuta në mëngjes që të konsumoni bashkë vaktin kryesor të ditës, mos e lini këtë gjë për darkën, sepse dreka asnjëherë nuk është e mundur t’ju mbledhë bashkë sidomos gjatë javës kur jeni në punë.
Një fetë buke me gjalpë, një gotë qumësht, një vezë e zier, ose një lëng portokalli e plot gjëra të tjera për të kombinuar mëngjeset do të ndryshojnë shëndetin dhe sjelljen e fëmijës e gjithë familjes, nëse përkushtoheni aq sa duhet te mëngjesi.