Federata Sindikale e Shëndetësisë së Kosovës ka reaguar pas lehtësimit të masave antiCOVID nga Qeveria në detyrë.
Përmes një reagimi, FSShk e ka quajtur skandaloz dhe të papranueshëm këtë vendim të Qeverisë, e siç thonë ata, aq më keq si duket për apetite politike asnjë parti politike nuk reagon.
“Andaj FSSHK edhe njëherë kërkon përgjegjësi kolektive, popullore që ta ruani veten, është më se evidente që të gjitha partitë politike nuk e kanë prioritet shëndetin publik të popullit por vetëm votën e tyre. Apelojmë që IKSHPK dhe të gjithë ekspertët e shëndetësisë të distancohen nga veprimet politike vetëvrasëse dhe të mos jenë pjesë e vendimeve skandaloze për popullin e Republikës së Kosovës. FSSHK apelon tek të gjitha mediat dhe i lut që të mos jenë pjesë e kësaj kampanje antikombëtare, ne nuk mund të jemi sponsor tuaj, por ne mund të mbrojmë shëndetin tuaj. Ju lutemi dhe përgjërohemi thirrni mendjes në veprimet tuaja. Jeta është më e shtrenjtë se një votë”, thuhet në reagim të FSSHK-së./UBTNews