Demokracia e brishtë e Moldavisë jeton nën hijen e pushtimit të Moskës në Ukrainën fqinje dhe përpjekjeve të agjentëve pro-rus për të minuar ambiciet e saj drejt integrimit evropian.
Tashmë do të jetë një arritje logjistike dhe politike nëse Komuniteti Politik Evropian (EPC) arrin të mbledhë dhjetëra krerë shtetesh dhe qeverish të enjten për samitin, për të dhënë një mesazh se qëndrojnë në solidaritet me qeverinë pro-perëndimore të Moldavisë.
“Nuk ka pasur kurrë një mega-ngjarje të tillë në historinë e Moldavisë”, tha Felix Hett, ekspert për Ukrainën dhe Moldavinë në Fondacionin Friedrich Ebert të Gjermanisë.
“Nëse gjithçka shkon mirë, samiti do të jetë një ngjarje promovuese për Moldavinë, një dëshmi e asaj që vendi i vogël mund të arrijë”, tha ai për AFP.
Moldavia është e ndarë mes një rajoni të shkëputur të pushtuar nga “paqeruajtësit” rusë dhe politika e saj është minuar nga korrupsioni dhe provokatorët e huaj.
Ajo ka mbetur prapa fqinjëve në perëndim dhe në veri në përpjekjen për t’u bashkuar me projektin evropian, por vëmendja e shtuar nga vendet perëndimore që i kushtohet rajonit që nga pushtimi i përgjithshëm i Rusisë në Ukrainë, ka tronditur tablonë politike.
“Politikanët moldavë janë të vetëdijshëm se [për] statusin e kandidatit në BE i detyrohet luftës në Ukrainë”, tha Hett.
Për të siguruar organizimin e sigurt dhe të rregullt të samitit, është krijuar një operacion i gjerë i trafikut ajror për të akomoduar avionët e udhëheqësve në aeroportin e vogël të Moldavisë./UBTNews/