Ylva Johansson e Suedisë ishte ministre në qeverinë e Stefan Löfven në vitin 2015, kur kriza evropiane e emigracionit pa miliona refugjatë sirianë të mbërrinin në brigjet e Evropës.
Stokholmi pranoi 135,000 refugjatë atë vit, kryesisht nga Iraku, Siria dhe Afganistani, dhe më pas 163,000 të tjerë në vitin 2016, numri më i madh nga çdo shtet tjetër evropian.
“Më kujtohet ndjenja ime atëherë”, kujton Johansson, shtatë vjet më vonë. “Sa të vetëm u ndjemë”.
Për Johansson, tani Komisionere Evropiane për Çështjet e Brendshme, dështimet e pasojave të vitit 2015 ishin të dyfishta. Nga njëra anë, vendet evropiane vepruan kryesisht në mënyrë të njëanshme në përgjigjen e tyre ndaj krizës, ku disa hapën kufijtë e të tjerë i mbyllën. Nga ana tjetër, nuk u bë mjaftueshëm për të integruar refugjatët kur ata mbërritën në Evropë.
“Ne kemi marrë një mësim, shpresoj, nga viti 2015”, tha ajo për Euronews.
Këtë javë Brukseli prezantoi Direktivën e Mbrojtjes së Përkohshme, një ligj i vitit 2001 që do t’u lejojë shtetasve ukrainas të zhvendosur nga lufta të kualifikohen menjëherë për strehim, kujdes shëndetësor, punësim dhe shkollim për fëmijët e tyre. Ndryshe nga viti 2015, vendosja e refugjatëve do të ndahet në të gjitha shtetet anëtare të BE-së.
“Do të ketë presion të madh mbi shoqëritë tona, nuk jam naive, por mendoj se tani ka një mundësi për të vepruar ndryshe”.
Johansson hodhi poshtë idenë se qasja e direktivës mund të zgjerohet për t’u zbatuar për të gjithë refugjatët që mbërrijnë në Evropë.
Sa i përket faktit nëse ajo mbështet që Ukraina të bëhet anëtare e BE-së, siç ka bërë thirrje presidenti ukrainas Volodymyr Zelenksyy, ajo tha se kjo mund të marrë kohë.
“Ukraina i përket Evropës. Ata po luftojnë për vlerat tona. Të qenit një anëtar zyrtar i BE-së është një rrugëtim mjaft i gjatë, por përkatësia e tyre emocionale është aty”, tha ajo./UBTNews/