Presidenti turk, Recep Tayyip Erdogan, ka hedhur poshtë idenë të prezantuar nga presidenti amerikan, Donald Trump, për të zhvendosur palestinezët nga Gaza, duke e quajtur këtë propozim të papranueshëm dhe të paarsyeshëm. Në një konferencë për shtyp të hënën, Erdogan ka deklaruar se asnjë forcë nuk ka fuqinë të dëbojë popullin e Gazës nga “atdheu i tyre i përjetshëm”.
Duke komentuar propozimin e administratës së re amerikane për të zhvendosur palestinezët nga Gaza, Erdogan ka thënë se një mendim i tillë nuk është asgjë më shumë se një çështje që “nuk ia vlen të merret në konsideratë apo të diskutohet”. Ai ka theksuar se ky propozim është i nxitur nën presionin e “lobit sionist” dhe se nuk ka vend për të njëjtën çështje në diskutimet e politikës turke.
“Askush nuk ka fuqinë për të larguar popullin e Gazës nga atdheu i tyre i përjetshëm”, ka shtuar Erdogan gjatë një konference për gazetarët, përpara nisjes së një udhëtimi në Malajzi.
Këto ishin komentet e para të presidentit turk për propozimin e Trumpit për zhvendosjen e palestinezëve nga Gaza, pas shqetësimeve të ngritura nga diplomacia turke për këtë çështje. Javën e kaluar, ministri i Jashtëm turk, Hakan Fidan, kishte cilësuar këtë propozim si “të papranueshëm” dhe ka shprehur mbështetje të fortë për të drejtat e popullit palestinez dhe integritetin e Gazës.
Komentet e Erdoganit reflektojnë një kundërshtim të fortë të politikave të administratës amerikane dhe një angazhim të vazhdueshëm të Turqisë për të mbështetur popullin palestinez dhe të drejtat e tij në Gaza./UBTNews/
