Ekipi përfaqësues i Kosovës për garën ndërkombëtare të robotikës “FIRST Global Challenge”, ka arritur në Zvicër, nga ku në qytetin e Gjenevës do të zhvillojë garat në një garë të një niveli krejtësisht tjetër, për sa i përket fushës së robotikës dhe STEM.
Së bashku me ekipin përfaqësues përveç mentores Elita Hajrizi, nxënësve: Harisa Haziri, Rrezon Halimi dhe Muhamed Shala, ka udhëtuar edhe presidenti i UBT-së, Prof. Dr. Edmond Hajrizi, për të shprehur mbështetjen e plotë për ekipin nga Kosova.
“Jemi këtu së bashku për të treguar se të rinjtë nga Kosova mund të bëjnë gjëra të cilat ndoshta edhe nuk janë parë më parë. Si UBT jemi këtu për të ofruar mbështetjen e plotë për këtë ekip, pasi që kemi të gjitha mundësitë infrastrukturore për t’u ofruar të rinjve tanë hapësira të bollshme për zhvillimin e talentit të tyre në robotikë dhe STEM”, ka thënë presidenti Hajrizi.
Tutje, mentorja e ekipit përfaqësues të Kosovës, Elita Hajrizi ka thënë se ekipi nga Kosova është gati për këtë garë, dhe se me padurim po e presin fillimin e kësaj gare, e cila sipas saj është më shumë se nivel garues dhe kompetitiv.
“Jemi gati për këtë garë, Harisa, Rrezoni dhe Muhamedi janë gati për të treguar punën dhe talentin e tyre. Ata përgjatë gjithë kësaj periudhe me përkushtim të madh kanë qëndruar me orë të tëra për të shfaqur talentin dhe idetë e tyre rreth tematikës së këtij viti në “FIRST Global Challenge”, dhe si do që të jetë rezultatin final i garës, ata kanë treguar se kanë talentë në fushën e robotikës”, ka thënë Elita.
Gara ndërkombëtare e robotikës “FIRST Global Challenge”, do të nis të premtën, më 14 tetor 2022, dhe do të zgjasë deri më 16 tetor, ku edhe do të vendoset për ekipin më kreativ dhe më të mirë të këtij viti.
