Ish-zëdhënësi i Ushtrisë Çlirimtare të Kosovës, Jakup Krasniqi, është deklaruar i pafajshëm për akuzat e Speciales ndaj tij për krime lufte dhe kundër njerëzimit.
Krasniqi në fjalimin e tij gjatë seancës së të mërkurës, ka thënë se nuk ka qenë kurrë i përfshirë në vrasjen, dhunën, qoftë psiqike apo fizike, apo torturën e ndonjë personi.
“Nuk e kuptoj logjikën e akuzës. Unë e urrej dhunën, vrasjet, burgosjet, torturat, dënimet, jo pse janë ushtruar ndaj meje dhe ndaj nesh si popull por janë tepër të ulëta dhe çnjerëzore. Çdo njeri që flet të vërtetën e di që asnjëherë nuk kam qenë i përfshirë në asnjë vrasje, burgosje, e presion ndaj askujt”, ka thënë Krasniqi.
Ai ka thënë se integriteti i tij personal dhe intelektual nuk do ta lejonte që të përdorte ndaj dikujt dhunë si mjet. Tutje Krasniqi ka treguar kujtimet e gjenocidit serb si fëmijë, e pastaj edhe si i rritur.
“Që në fëmijëri kam qenë i rrethuar me njerëz që kishin qenë viktima të gjenocidit serb. Asnjë hetues, asnjë gjyqtar i Jugosllavisë nuk ka marr përgjegjësi për këto krime. Pas më shumë se 10 vitesh, u lirova nga burgu i Novi Sadit, por kjo nuk do të thoshte se dola në liri. Nga burgu i Novi Sadit që kishte plot shqiotarë, dola në burgun e quajtur Kosovë. Pas kthimit në Kosovë, u angazhova në luftën për liri”, deklaroi.