Të paktën 12 persona vdiqën të hënën në Peru ndërsa protestuesit që përpiqeshin të sulmonin një aeroport u përleshën me forcat e sigurisë, shpërthimi i fundit i dhunshëm gjatë një krizeje politike njëmujore.
Ky kapitull i ri i gjakderdhjes ndodhi në qytetin juglindor të Juliaca-s, në rajonin Puno, tha një zyrtar në zyrën e ombudspersonit lokal për AFP.
Protestuesit po kërkonin largimin e Presidentes Dina Boluarte, e cila mori detyrën pas rrëzimit dhe arrestimit të presidentit të atëhershëm, Pedro Castillo më 7 dhjetor, përcjell UBT News.
Largimi i Castillos pasi ai u përpoq të shpërndante kongresin dhe të fillonte të qeverisë me dekret — pasi po hetohej për korrupsion — ka shkaktuar përleshje në mbarë vendin për javë të tëra, vend ky i njohur për paqëndrueshmëri politike.
Protestuesit e zemëruar për largimin e Castillos duan që Boluarte të japë dorëheqjen dhe kërkojnë zgjedhje të reja.
Personat e vrarë të hënën në Juliaca kishin plagë me armë zjarri, tha një zyrtar në Spitalin Calos Monge për një kanal televiziv peruan.
Në përgjithësi, përleshjet e shkaktuara nga rrëzimi i Castillos kanë lënë tani 34 të vdekur në të gjithë vendin.
“Ajo që po ndodh është se peruanët po masakrojnë njëri-tjetrin. Unë kërkoj qetësi”, tha kryebashkiaku i Juliaca-s, Oscar Caceres, në një lutje të dëshpëruar për paqe.
Demonstruesit kishin tentuar tashmë të shtunën të pushtonin aeroportin Juliaca, i cili mbrohet nga policia dhe ushtarët./UBTNews/