Presidenti i Polonisë, Andrzej Duda deklaroi sot se fakti që Rusia ndërpreu furnizimin me gaz për Poloninë dhe Bullgarinë, shkeli parimet bazë ligjore.
“Janë shkelur parimet bazë ligjore, do të ndërmerren hapat e duhur ligjorë dhe do të kërkohet kompensim adekuat nga Gazprom për shkeljen e dispozitave të marrëveshjes”, tha Duda gjatë vizitës në Pragë.
Kryeministri çek, Petr Fiala tha se vendi i tij nuk ka asnjë sinjal apo informacion se furnizimi i tij me gaz do të ndërpritet, por se duhet të jetë gati për të gjithë skenarët. Republika Çeke është pothuajse plotësisht e varur nga Rusia për gaz.
Ministri sllovak i Ekonomisë, Richard Sulik tha se vendi nuk përballet me rrezikun e menjëhershëm të ndërprerjes së furnizimit me gaz ose naftë rus. Rusia plotëson rreth 85% të kërkesës së Sllovakisë për gaz.