Deputetët francezë refuzuan të shqyrtonin një projekt-ligj që transformon lejen shëndetësore të vendit për COVID në një leje vaksinimi.
Kjo ishte befasi të hënën për qeverinë që kishte shpresuar ta shtynte legjislacionin sa më shpejt të ishte e mundur.
Nëse miratohet, leja do të kufizojë aksesin në shumicën e vendeve publike vetëm për njerëzit e vaksinuar plotësisht ose ata që janë shëruar së fundmi nga COVID-19. Ajo do t’i ndalonte njerëzit të merrnin një leje kalimi duke treguar një test negativ PCR, siç është e mundur tani për tani.
Kryetarët e grupeve parlamentare u takuan të martën në mëngjes përpara se projektligji të hidhej sërish para deputetëve.
Pezullimi i befasishëm – i mirëpritur me zë të lartë nga opozita – ka të ngjarë të prishë planin kohor për miratimin përfundimtar të projekt-ligjit nga parlamenti, i cili fillimisht ishte planifikuar për në fund të javës.
“Është një shuplakë për qeverinë”, tha deputeti Julien Aubert, ndërsa Jean-Luc Mélenchon, kreu i partisë së majtë të ekstremit La France Insoumise, përshëndeti “korrigjimin” që iu bë Olivier Véran, ministrit të shëndetësisë të Francës.
Véran kishte kërkuar që ligjvënësit të debatonin brenda natës të hënën, në mënyrë që projektligji të mund të kalonte shpejt në dhomën e sipërme.
Zëdhënësi i qeverisë, Gabriel Attal, ka pohuar se ata do të bënin “çdo gjë që mundemi” për të siguruar që projektligji të miratohet./UBTNews/