Një rrjedhje masive nga një prej bankave private më të mëdha në botë, Credit Suisse, ka ekspozuar pasurinë e fshehur të klientëve që janë të përfshirë në tortura, trafik droge, pastrim parash, korrupsion dhe krime të tjera të rënda, përcjell UBT News.
Detajet e llogarive të lidhura me 30,000 klientë të Credit Suisse në të gjithë botën gjenden në rrjedhjen, e cila demaskon përfituesit e më shumë se 100 miliardë frangave zvicerane (80 miliardë £)* të mbajtura në një nga institucionet financiare më të njohura të Zvicrës.
Rrjedhja tregon për dështime të gjera të kujdesit të duhur nga Credit Suisse, pavarësisht nga premtimet e përsëritura gjatë dekadave për të hequr klientët e dyshimtë dhe fondet e paligjshme.
Credit Suisse tha se ligjet e rrepta të sekretit bankar të Zvicrës e penguan atë të komentonte mbi pretendimet në lidhje me klientët individualë.
Ndërsa disa llogari në të dhënat ishin të hapura që në vitet 1940, më shumë se dy të tretat u hapën që nga viti 2000. Shumë prej tyre ishin ende të hapura në dekadën e fundit dhe një pjesë mbeten të hapura edhe sot, shkruan The Guardian, transmeton UBT News.
Koha e rrjedhjes vështirë se mund të jetë më e keqe për Credit Suisse, e cila kohët e fundit është përfshirë nga skandale të mëdha. Muajin e kaluar, ajo humbi kryetarin e saj, António Horta-Osório, pasi ai theu dy herë rregullat kundër Covid-19.
Këtë muaj, Credit Suisse u bë banka e parë e madhe zvicerane në historinë e vendit që u përball me akuza penale – të cilat ajo i mohon – në lidhje me pretendimin se ndihmoi në pastrimin e parave nga tregtia e kokainës në emër të mafies bullgare./UBTNews/