Britney Spears ka hyrë në rehabilitim, një muaj pasi u arrestua nën dyshimin për drejtim të automjetit nën ndikimin e alkoolit dhe drogës.
Këngëtarja është regjistruar vullnetarisht në një qendër trajtimi, ka konfirmuar përfaqësuesi i saj për disa media amerikane të dielën.
Pas arrestimit më 4 mars, përfaqësuesi i artistes e ka cilësuar incidentin si “plotësisht të pajustifikueshëm”, duke shtuar se të afërmit e saj do të hartojnë një plan të domosdoshëm për ta mbështetur në rrugën drejt stabilitetit dhe mirëqenies.Hyrja e saj në trajtim vjen tre javë para se 44-vjeçarja të paraqitet në gjykatë në Kaliforni për t’u përballur me akuzën për drejtim nën ndikim.
Muajin e kaluar, Spears ishte raportuar tek autoritetet pasi kishte drejtuar BMW-në e saj në mënyrë “të çrregullt dhe me shpejtësi të lartë” në një autostradë, ka bërë të ditur California Highway Patrol.Sipas autoriteteve, ajo kishte shfaqur shenja të dehjes dhe i ishte nënshtruar testeve të maturisë në terren pas ndalimit të automjetit.
Më pas, përfaqësuesi i saj për BBC ka deklaruar se Britney do të ndërmarrë hapat e duhur dhe do të bashkëpunojë me ligjin, duke shpresuar që kjo të jetë fillimi i një ndryshimi të domosdoshëm në jetën e saj.Ai ka shtuar se familja dhe të afërmit e saj do të angazhohen për të krijuar një plan mbështetës për mirëqenien e saj.
Spears është një nga yjet më të suksesshme të muzikës pop në histori, me hite si “Baby One More Time”, “Toxic”, “Everytime”, “Gimme More”, “Womanizer” dhe “Stronger”.
Për 13 vite, deri në vitin 2021, ajo ka qenë nën një kujdestari ligjore që i kontrollonte financat dhe jetën personale nga babai i saj, i cili kishte deklaruar se kjo ishte e nevojshme për shkak të gjendjes së saj të rënduar fizike, emocionale, mendore dhe financiare.