Shefi i politikës së jashtme dhe sigurisë së Bashkimit Evropian, Josep Borrell, ka thënë të enjten se nuk ka plane për evakuimin e qytetarëve të BE-së nga Gaboni, një ditë pasi ushtria mori pushtetin në vendin e Afrikës Perëndimore, duke përmbysur rezultatet e fundit të zgjedhjeve.
Duke folur me gazetarët në qytetin spanjoll të Toledos, Borrell e krahasoi situatën në Gabon me atë në Niger, i cili pësoi grusht shtet muajin e kaluar.
“Sigurisht, grusht shtetet nuk janë zgjidhja, por nuk duhet të harrojmë se në Gabon pati zgjedhje me plot parregullsi”, ka thënë ai, duke argumentuar se vota e manipuluar mund të përbëjë grusht shtet institucional civil.
Në një takim në Toledo, ministrat e jashtëm të BE-së po diskutojnë mënyrat për të mbështetur bllokun e Komunitetit Ekonomik Rajonal të Shteteve të Afrikës Perëndimore (ECOWAS) në lidhje me grusht shtetin në Niger.
Muajin e kaluar, junta ushtarake e Nigerit përmbysi presidentin e zgjedhur Mohamed Bazoum dhe më vonë ka thënë se kishte për qëllim ta gjykonte atë për tradhti. ECOWAS ka paralajmëruar vazhdimisht se mund të përdorë ndërhyrjen ushtarake për të shuar grusht shtetin.