Presidenti i SHBA Joe Biden dhe homologu i tij francez Emmanuel Macron u zotuan të mërkurën të koordinojnë përgjigjen e tyre ndaj grumbullimit të trupave ruse në kufirin ukrainas, tha Shtëpia e Bardhë.
Ministri i Jashtëm i Francës, Jean-Yves Le Drian, do të zhvillojë bisedime mbi krizën në Bukuresht të enjten me nëntë ministra nga Evropa Lindore dhe shtetet baltike.
Në një telefonatë të bërë menjëherë pasi Macron tha se ai mund të vizitojë Rusinë për të kërkuar një zgjidhje diplomatike, udhëheqësi francez dhe Biden “pohuan mbështetjen e tyre për sovranitetin dhe integritetin territorial të Ukrainës”, tha Shtëpia e Bardhë.
Në deklaratë gjithashtu thuhet se ata rishikuan koordinimin e vazhdueshëm si për diplomacinë ashtu edhe për përgatitjet ndaj Rusisë nëse ajo pushton Ukrainën.
“Presidenti Biden dhe Presidenti Macron ranë dakord që ekipet e tyre do të qëndrojnë në kontakt të ngushtë, duke përfshirë konsultimin me aleatët e NATO-s dhe partnerët e BE-së, për qasjen tonë të koordinuar dhe gjithëpërfshirëse për menaxhimin e këtyre çështjeve”.
Rusia ka vendosur më shumë se 100,000 trupa të armatosura rëndë rreth Ukrainës. Shtetet e Bashkuara dhe aleatët e saj akuzojnë Moskën se po përgatitet të pushtojë ish-republikën sovjetike, e cila ka ambicie për t’u bashkuar me institucionet perëndimore, përfshirë NATO-n.
Moska thotë se trupat janë atje për shkak të kërcënimeve nga Shtetet e Bashkuara dhe aleatët e saj./UBTNews/