Shtetet anëtare të Bashkimit Evropian po përballen me “rrezik të lartë të sulmeve terroriste” si pasojë e luftës së vazhdueshme në Rripin e Gazës, konfirmoi komisionerja e BE-së për Çështjet e Brendshme, Ylva Johansson.
Duke folur në prag të takimit të ministrave të brendshëm të BE-së në Bruksel, Johansson iu referua sulmit me thikë që ndodhi gjatë fundjavës në Paris, si pasojë e të cilit një turist gjerman u vra dhe dy të tjerë u plagosën.
“Me luftën mes Izraelit dhe Hamasit dhe polarizimin që shkakton në shoqërinë tonë, me ardhjen e festave ekziston rrezik i lartë për sulme terroriste në Bashkimin Evropian”, deklaroi ajo.
Ajo njoftoi se Bashkimi Evropian do t’i dhurojë 30 milionë euro shtesë për mbrojtjen e vendeve të kultit./UBTNews/