Bashkimi Evropian duhet të përdorë mbi 300 miliardë euro asete të huaja të ngrira ruse për të ndihmuar Ukrainën, tha të premten kryeministrja e Estonisë, Kaja Kallas.
“Sot do të fokusohemi në Ukrainë. Para së gjithash, duhet të flasim për përdorimin e aseteve [të ngrira] që kemi – asetet [e ngrira] ruse. Ne kemi mbi 300 miliardë euro asete [të ngrira] dhe si mund t’i përdorim ato në dobi të Ukrainës”, u tha Kallas gazetarëve në Bruksel, ku po merr pjesë në një takim të Këshillit të BE-së.
Në një postim në Twitter, Kallas tha se ishte “koha [që BE] të ecë përpara duke bërë që agresori të paguajë”.
“Së dyti, ne patjetër duhet të diskutojmë përgjigjen ligjore ndaj krimeve të agresionit që janë kryer dhe si të bëjmë një gjykatë të veçantë për t’i ndjekur penalisht ata”, u tha gjithashtu Kallas gazetarëve./UBTNews/