Bashkimi Evropian ka theksuar kërkesën ndaj Serbisë, si vend kandidat për anëtarësim, që të përshtatë qëndrimin e saj në politikën e jashtme me politikën e BE-së dhe të shmangë veprime që janë në kundërshtim me këto qëndrime. Kjo kërkesë fokusohet kryesisht te qëndrimi i Serbisë ndaj Rusisë, një vend që BE-ja ka vënë sanksione për shkak të luftës në Ukrainë, ndërkohë që Serbia vazhdon të ruajë raporte të ngushta me Rusinë.
Diplomatët e BE-së kanë theksuar se Serbia duhet të përmbushë angazhimet e saj për t’u përshtatur me politikën e jashtme të BE-së si prioritet, duke përfshirë shmangien e veprimeve që bien në kundërshtim me këto politika. Kjo kërkesë është bërë edhe më e fortë pas vizitës së ministrit të Jashtëm të Serbisë, Marko Gjuriq, në Moskë, ku ai u takua me ministrin e Jashtëm rus, Sergej Lavrov.
Sipas një zëdhënësi të BE-së, ndërkohë që BE-ja po përgatit një paketë të re sanksionesh ndaj Rusisë, Serbia, si një vend kandidat për anëtarësim, pritet të mos ndërmarrë hapa kundër kësaj politike. Po ashtu, diplomatët e BE-së kanë ngritur shqetësimin se marrëdhëniet e ngushta të Serbisë me Rusinë, përveç çështjeve të sundimit të ligjit dhe normalizimit të marrëdhënieve me Kosovën, po pengojnë hapjen e disa kapitujve të rinj në procesin e anëtarësimit të Serbisë në BE, edhe pse vendi ka përmbushur kushtet teknike për këtë./UBTNews/
