Banka Qendrore Evropiane (BQE) do të zgjedhë një dizajn të ri për kartëmonedhat euro deri në vitin 2024, transmeton UBT News.
Monedha e eurozonës u prezantua për herë të parë në 1999, me monedha dhe kartëmonedha që u lansuan në 2002.
“Pas 20 vjetësh, është koha për të rishikuar pamjen e kartëmonedhave tona për t’i bërë ato më të lidhura me evropianët e të gjitha moshave dhe prejardhjeve”, tha në një deklaratë presidentja e BQE, Christine Lagarde.
Banka me bazë në Frankfurt do të krijojë fokus grupe për të mbledhur opinione nga njerëzit në të gjithë zonën e euros mbi temat e mundshme për kartëmonedhat e ardhshme.
Një grup këshillues me një ekspert nga çdo vend i eurozonës do të paraqesë më pas një listë me tema të reja. Ekspertët vijnë nga fusha të tilla si historia, shkencat natyrore dhe sociale, artet pamore dhe teknologjia.
Banka më pas do t’i bëjë thirrje publikut për kontributin e tyre në temat e përzgjedhura. Një konkurs dizajni do të pasojë përpara se publiku të konsultohet edhe një herë.
Këshilli drejtues i BQE-së do të marrë një vendim përfundimtar përpara se kartëmonedhat e reja të emetohen deri në vitin 2024.
“Ne duam të zhvillojmë kartëmonedha euro me të cilat qytetarët evropianë mund të identifikohen dhe të jenë krenarë t’i përdorin si paratë e tyre”, tha në një deklaratë anëtari i Bordit Ekzekutiv të BQE-së, Fabio Panetta./UBTNews/