Policia e Kosovës ka arrestuar një person pasi posedonte armë dhe municion në fshatin Madanaj të Gjakovës.
Kjo është e bërë e ditur përmes një njoftimi për media nga zyra e informimit e Policisë së Kosovës për rajonin e Gjakovës.
Sipas njoftimit të policisë, njësitet patrulluese derisa ishin duke hetuar dhe trajtuar një rast lidhur me një kontest pronësor në fshatin Madanaj-Gjakovë, rreth orës 11:15 kanë arritur të sigurojnë informacion se i dyshuari Gj. Gj., (mashkull, lindur në vitin 1978, shtetas i Republikës së Kosovës,) kishte në posedim armë.
Sipas policisë, pas kontrollimit të tij, në posedim i janë gjetur dy pistoleta me nga dy karikatorë dhe 20 copë fishekë.
“Ama dhe municioni janë sekuestruar, ndërsa i dyshuari me vendim të prokurorit të shtetit, është ndalur në mbajtje për 48 orë, si dhe ndaj tij është iniciuar rast “Mbajtje në pronësi, kontroll ose posedim të paautorizuar të armëve””, njofton policia.