Arabia Saudite hapi hapësirën e saj ajrore të premten për të gjithë transportuesit civilë, duke përfshirë të gjitha fluturimet për në dhe nga Izraeli, në një hap drejt normalizimit të marrëdhënieve midis dy kombeve ndërsa presidenti i Shteteve të Bashkuara të Amerikës, Joe Biden bën një turne në Lindjen e Mesme.
Në një deklaratë para se të nisej nga Izraeli për në Arabinë Saudite, Biden përshëndeti vendimin e mbretërisë, duke thënë se ky vendim mund t’i kontribuojë integrimit të mëtejshëm të Izraelit në rajon.
Administrata Biden ka kërkuar prej muajsh të zyrtarizojë marrëveshjet e sigurisë dhe ato ekonomike mes Arabisë Saudite dhe Izraelit, në një përpjekje për të normalizuar raportet mes dy vendeve.
Riadi besohet se ka një marrëdhënie të fshehtë me Izraelin, por ende nuk i ka zbuluar zyrtarisht ato lidhje diplomatike. Në vitin 2020, kryeministri i atëhershëm izraelit, Benjamin Netanyahu thuhet se fluturoi drejt Arabisë Saudite për një takim të fshehtë me liderin de fakto të mbretërisë, Princin e Kurorës, Mohammed bin Salman – një pretendim që u mohua nga kryediplomati i Riadit./UBTNews/