Një numër i faqeve të internetit shtetërore, duke përfshirë faqen zyrtare të Kremlinit, u prekën nga ndërprerja fundjavën që lamë pas, përcjell UBT News.
Hakerët pro-ukrainas kanë nisur një valë sulmesh kibernetike kundër Rusisë. Ata hakuan edhe kanalet televizive ruse duke lëshuar këngë ukrainase. Ndërsa rrjetet e qeverisë së Kremlinit janë çaktivizuar në atë që hakerët e përshkruajnë si një luftë kibernetike kundër Vladmir Putinit.
Ndërsa lufta në Ukrainë përshkallëzohet, faqja zyrtare e Kremlinit, kremlin.ru, u prek nga ndërprerja të shtunën së bashku me gjashtë faqe të tjera shtetërore ruse. Kjo erdhi pasi zëvendëskryeministri i Ukrainës tha se kishte nisur një “ushtri IT” për të luftuar Rusinë në hapësirë kibernetike.
Kyiv Independent zbuloi gjithashtu se hakerët luanin këngë ukrainase në kanalet televizive ruse dhe çaktivizuan faqet e internetit të qeverisë duke përfshirë atë të Ministrisë së Mbrojtjes dhe Dumës.
Kanali televiziv Russia Today gjithashtu u hakerua dhe u hoq uebfaqja e RT News.
Kolektivi i hakerëve Anonymous mori përgjegjësinë për sulmet në një postim, duke postuar në Twitter: “#Anonymous është në luftë me Rusinë”.
Anonymous është një grup hakktivist i decentralizuar pa hierarki apo udhëheqje, misioni i të cilit është të luftojë hipokrizinë dhe korrupsionin.
Lëvizja e fundit vjen pasi llogaria e grupit në Twitter deklaroi të enjten se ata ishin “aktualisht të përfshirë në operacione kundër Federatës Ruse”.
“Ne duam që populli rus të kuptojë se ne e dimë se është e vështirë për ta të flasin kundër diktatorit të tyre nga frika e ndëshkimeve”, thanë ata.
“Ne si kolektiv duam vetëm paqe në botë. Ne duam një të ardhme për të gjithë njerëzimin. Pra, ndërsa njerëzit anembanë globit i thyejnë ofruesit tuaj të internetit deri në copa, kuptoni se ai drejtohet tërësisht veprimeve të qeverisë ruse dhe Putinit”.
Një numër i platformave të mediave sociale kanë ndërmarrë gjithashtu veprime për të frenuar dezinformimin rus që shpërndahet, duke përfshirë YouTube, Twitter dhe Facebook. Kjo përfshin parandalimin e kanaleve ruse që të shfaqin reklama dhe të gjenerojnë të ardhura nga platformat e tyre./UBTNews/