Një aksident tragjik në Iran ka shkaktuar vdekjen e 28 pelegrinëve pakistanezë, që udhëtonin për në qytetin e shenjtë të Qerbelasë në Irak. Autobusi që transportonte pelegrinët është përmbysur të martën në mbrëmje në provincën Yazd, për shkak të një defekti në sistemin e frenimit, sipas raportimeve të para nga hetimi i policisë, njoftoi Reuters.
Nga aksidenti janë plagosur edhe 23 pasagjerë, shtatë prej të cilëve ndodhen në gjendje kritike, raportoi drejtori i menaxhimit të krizave të provincës për televizionin shtetëror iranian. Në autobus besohet se ishin rreth 53 persona në momentin e përplasjes, përfshirë pelegrinë nga qytetet Larkana, Ghotki dhe të tjera në provincën Sindh të Pakistanit.
Sipas raportimeve të medieve lokale, autobusi shpërtheu në flakë përpara pikës së kontrollit Dehshir-Taft, rreth 681 km në jug të Teheranit. Presidenti i Pakistanit, Asif Ali Zardari, ka urdhëruar mobilizimin e Ministrisë së Jashtme për të riatdhesuar trupat e viktimave dhe për të ofruar ndihmë për të plagosurit.
Pelegrinazhi, i njohur si Arbain, shënon fundin e një periudhe prej 40 ditësh zie për Imam Huseinin, nipin e profetit Muhamed, dhe aktualisht po ndjekin rreth dy milionë pelegrinë myslimanë shiitë. Irani është i njohur për problemet e tij me sigurinë në trafik, me rreth 20,000 vdekje në vit nga aksidentet./UBTNews/