Akademia Ndërkombëtare Verore e Fakultetit Shkenca Kompjuterike dhe Inxhinieri në UBT, ditën e dytë të saj e ka filluar me ligjëratën e dr. Bertan Karahoda, për inteligjencën artificiale.
Ai ka shtjelluar në detaje çështjet që ndërlidhen me inteligjencën artificiale, teksa Blend Krasniqi dhe Lirian Dragusha kanë vazhduar diskutimin rreth AR dhe VR teknologjisë, gamingut dhe multimedias. Liriani dhe Blendi kanë prezantuar lojën e quajtur “Voyager”, krijuar nga këta të fundit, të cilët shpjeguan karakteristikat e lojërave, si dhe platformat e zhvillimit të lojërave.
Dita e dytë e Akademisë Ndërkombëtare Verore të Fakultetit Shkenca Kompjuterike dhe Inxhinieri në UBT është përmbyllur me diskutimin për mjekësinë ligjore të sigurisë kibernetike, nga drejtori i departamentit të IT-Forenzikës në Agjencinë e Kosovës për Forenzikë, Blerim Krasniqi.
Profesori në UBT, dr. Bertan Karahoda, ka vazhduar ligjërimin në ditën e tretë për inteligjencën artificiale, temë e cila është e një rëndësie të lartë, marrë parasysh zhvillimin e hovshëm të teknologjisë informative, teksa diskutimet kanë vazhduar edhe më tutje për shërbimet dhe teknologjitë Cloud.
Dita e katërt e Akademisë Ndërkombëtare Verore të Fakultetit Shkenca Kompjuterike dhe Inxhinieri në UBT, është karakterizuar me ligjërata dhe tema interesante.
Për sigurinë e pajisjeve mobile ka folur menaxheri i informacionit dhe sigurisë kibernetike në Raiffeisen Bank Vienna, Arti Karahoda. Ky i fundit ka shtjelluar rëndësinë e sigurimit të pajisjeve mobile dhe mënyrës se si duhet siguruar ato, duke ndarë përvojat dhe njohuritë e tij sa i përket kësaj teme.
Dita e pestë e Akademisë Ndërkombëtare Verore të Fakultetit Shkenca Kompjuterike dhe Inxhinieri është përmbyllur me ligjëratën e profesorit të UBT-së, can. PhD. Xhelal Jashari rreth ueb programimit, zhvillimin e ueb-it dhe mënyrës se si duhet bërë programimi.
