Asociacioni i Gazetarëve të Kosovës, sot ka dënuar sulmin ndaj kameramanit Jetmir Muji, në Veri të Mitrovicës.
AGK-ja ka shprehur shqetësim dhe tronditje me sulmin dhe njëherësh e ka ftuar Policinë e Kosovës, që ta hetojë me urgjencë rastin dhe t’i identifikojë personat përgjegjës.
“Kameramani i portalit “Insajderi”, Jetmir Muji, është sulmuar sot paradite në Mitrovicën e veriut nga një grup i serbëve lokalë, derisa ishte duke xhiruar për një emision. Sipas kësaj medie, Muji bashkë me gazetarin, Visar Duriqi, kanë qenë në veri për të përgatitur një emision, kur kanë parë futjen në veturë të një të riu nga disa persona. Kur Muji e ka xhiruar ngjarjen, ai është sulmuar nga këta persona, dhe ka përfunduar në Emergjencën e Spitalit në jug të Mitrovicës”, është bërë e ditur nga AGK.