Agjencia Ndërkombëtare e Energjisë Atomike është “gjithnjë e më shumë e shqetësuar për kushtet e vështira me të cilat përballet stafi” në termocentralin bërthamor të Zaporizhzhia të Ukrainës, tha të premten në një deklaratë Drejtori i Përgjithshëm i IAEA, Rafael Mariano Grossi.
Grossi theksoi gjithashtu se IAEA duhet të shkojë atje “sa më shpejt të jetë e mundur” dhe se situata në vend, nën kontrollin e forcave të armatosura ruse, është “qartësisht e paqëndrueshme”.
“IAEA është në dijeni për raportet e fundit në media dhe çdokund tjetër lidhur me kushtet e stafit në termocentralin bërthamor më të madh në vend”, deklaroi Grossi.
“Situata në këtë termocentral të madh bërthamor është qartësisht e paqëndrueshme. Ne jemi të informuar se stafi ukrainas po operon objektin në kushte jashtëzakonisht stresuese, ndërkohë që vendi është nën kontrollin e forcave të armatosura ruse”, tha ai, duke shtuar se raportet e fundit janë “shumë shqetësuese dhe rrisin shqetësimet për mirëqenien e personelit”./UBTNews/