Afrika do të përballet me një situatë “shumë serioze” të urisë nëse eksportet e grurit nga Ukraina në kontinent nuk rifillojnë, tha të enjten presidenti i Senegalit, Macky Sall, i cili është gjithashtu kryetar i Bashkimit Afrikan. Uria mund ta destabilizojë kontinentin, u tha Sall mediave franceze.
Duke përmendur takimin e tij javën e kaluar me presidentin rus, Vladimir Putin në Moskë, Sall kujtoi se ai i kërkoi Putinit ta ndihmojë Afrikën në qasje me plehëra dhe drithëra. Sall tha se gjatë takimit ai bëri thirrje për përfundim të luftës në Ukrainë.
Zyrtarët e OKB-së paralajmëruan të premten e kaluar se siguria globale e ushqimit po kërcënohet 100 ditë pas luftës Rusi-Ukrainë, duke thënë se kjo përbën kërcënim të urisë, destabilizimit dhe migrimit masiv në mbarë botën pasi Rusia bllokon portet e Detit të Zi që normalisht dërgojnë grurë në botë.
“Bllokimi në Detin e Zi rrezikon sigurinë globale të ushqimit dhe mallrave. Pasiguria ushqimore do të bëhet edhe më shqetësuese, me 1.7 miliard njerëz në rrezik të rritjes së varfërisë për shkak të krizës”, tha Amin Awad, koordinator i OKB-së për krizën në Ukrainë./UBTNews/