Pasagjerëve nga më shumë se 150 vende do t’u ndalohet kalimi tranzit përmes Hong Kong-ut, kjo si pasojë e shtrëngimit të fundit të masave të udhëtimit si pasojë e virusit.
Kjo lëvizje thellon izolimin global të Hong Kong-ut pasi qyteti ndjek një politikë të ashpër për parandalimin e virusit (e njohur si zero-Covid) dhe kjo po krijon probleme për linjat ajrore – disa prej të cilave kanë filluar të shmangin territorin kinez për shkak të rregullave të tij strikte të karantinës.
Hong Kongu i rendit territoret në kategori, duke u bazuar në numrin e infeksioneve të tyre, ku 153 vende janë klasifikuar aktualisht si Grupi A – të ardhurit e të cilëve duhet të kalojnë 21 ditë në karantinë.
Të premten, aeroporti i Hong Kongut shtrëngoi këto masa.
“Shërbimet e transferimit/transitit të pasagjerëve përmes Aeroportit Ndërkombëtar të Hong Kongut për çdo person që ka qëndruar në vendet e Grupit A në 21 ditët e fundit do të pezullohen”, tha aeroporti në një deklaratë, duke shtuar se ndalimi ishte i nevojshëm për të kontrolluar përhapjen e variantit Omicron. Pezullimi do të hyjë në fuqi të dielën, për një muaj.
Tetë vende të Grupit A si Australia, Kanadaja, Franca, India, Filipinet, Pakistani, Britania e Madhe dhe SHBA – tashmë janë të ndaluar plotësisht të shkojnë në Hong Kong.
Tani vendi ka rivendosur rregulla strikte për distancimin shoqëror, duke përfshirë mbylljen e palestrave dhe ndalimin e ngrënies në restorant pas orës 18:00./UBTNews/