Kryetari i LDK-së, Lumir Abdixhiku, ka përkujtuar të pagjeturit me rastin e 27 Prillit – Ditën e të Pagjeturve dhe 22 vjetorin e masakrës së Mejes.
Ai në dedikimin e tij, kërkon nga Institucionet e Kosovës, angazhim deri në zbardhjen e fatit të të pagjeturve, njofton Klan Kosova.
”Pranvera e vitit 1999 ishte më e rënda në historinë e Kosovës.
Ishte viti, kur Serbia filloi përpjekjet e fundit për ta zhbërë Kosovën dhe popullin e saj. Ajo kreu krime të tmerrshme kundër njerëzimit, masakroi qindra e mijëra shqiptarë, dogji shtëpi e shkolla dhe dëboi shumë shqiptarë nga vendi i tyre.
Ne sot, kujtojmë masakrën e Mejes ku u vranë e masakruan 376 civilë shqiptarë, por njëkohësisht shënojmë 27 Prillin – Ditën e të Pagjeturve.
Masakra e Mejes, 22 vjet më parë ishte ditë e dhimbjes, por edhe ditë e kthesës historike, ditë e cila e mobilizoi botën e civilizuar demokratike për t’u bërë pjesë e përpjekjeve të mëdha të popullit të Kosovës për liri.
Sot, e 22 vjet shumë familjarëve nuk u përfundojë ankthi i pritjes për ndonjë lajm për më të dashurit e tyre e që ende nuk dinë se ku prehen.
Institucionet e Kosovës duhet të angazhohen që ankthi i tyre të marrë fund, që sadopak t’iu zbutet dhimbja. Çështja e të pagjeturve mbetet ende plagë e hapur jo vetëm për familjarët, por për gjithë shoqërinë dhe shtetin tonë”.