Një adoleshent rus është dënuar me pesë vjet burgim pasi dyshohet se kishte planifikuar të hidhte në erë një ndërtesë virtuale të shërbimit të sigurisë FSB të krijuar në lojën kompjuterike Minecraft, përcjell UBT News.
Nikita Uvarov, 16 vjeç, u dënua me pesë vjet burg nga një gjykatë ushtarake siberiane për “trajnim për aktivitete terroriste”, tha avokati për të drejtat e njeriut, Pavel Chikov. Dy të pandehur të tjerë u liruan nga akuzat penale dhe iu dhanë dënime me kusht sepse bashkëpunuan me hetuesit, shtoi ai.
Policia mori telefonat e tyre dhe tha se gjeti një shkëmbim në lidhje me planet për të hedhur në erë një ndërtesë të FSB-së që ata krijuan në lojën e njohur Minecraft. Sipas hetuesve, treshja po mësonte gjithashtu të bënte mjete shpërthyese dhe praktikonte shpërthimin e tyre në ndërtesa të braktisura.
Adoleshentët fillimisht u përballën me akuza më të rënda për “pjesëmarrje në një organizatë terroriste”, por çështja u pushua për shkak të mungesës së provave.
Në fjalët e tij të fundit në gjykatë, të raportuara nga gazeta Novaya Gazeta, Uvarov foli për presionin nga autoritetet gjatë hetimit dhe mohoi të planifikonte të hidhte në erë ndonjë gjë. Ai u deklarua i pafajshëm dhe tha se nëse do të burgosej, ai do ta kryejë atë “me ndërgjegje dhe dinjitet të pastër”.
“Për herë të fundit në këtë gjykatë dua të them: Unë nuk jam terrorist”, tha ai.
Vitet e fundit ka pasur disa raste që të rinjtë rusë marrin dënime me burg për akuza të diskutueshme dhe parandaluese për terrorizëm./UBTNews/