Donald Trump të enjten dënoi mbështetësit e tij të dhunshëm që sulmuan Capitol Hillin një ditë më parë ku dhe pranoi humbjen ndaj rivalit të tij demokrat, presidentit të zgjedhur, Joe Biden.
Në një video-mesazh të ri, presidenti Trump tha se tani që Kongresi ka certifikuar rezultatet, “administrata e re do të inaugurohet më 20 janar” dhe “fokusi i tij tani kthehet në sigurimin e një tranzicioni të qetë dhe rregullt të pushtetit”. Ai gjithashtu foli kundër dhunës në Capitol, duke e quajtur atë një “sulm të neveritshëm”.
Presidenti Trump tha se ishte i “zemëruar nga dhuna, si dhe shkelja e ligjit dhe rendit”.
Trump nuk foli mbi rolin e tij në nxitjen e dhunës, por u tha mbështetësve të tij se, ndërsa ai e di se ata janë “të zhgënjyer”, ai dëshiron që ata ta dinë se “udhëtimi ynë i jashtëzakonshëm sapo ka filluar”.