Bojkotimi i punës dhe greva e operatorëve të transportit publik do të vazhdojë edhe nesër, ndërsa në ditën e premte Shoqata e Transportuesve Rrugor të Udhëtarëve do të organizojë protestë në Prishtinë, dhe të gjithë operatorët do t’i sjellin autobusët para Qeverisë së Kosovës.
Kryetari i kësaj shoqate, Ruzhdi Kurtishaj tha se Këshilli Drejtues i shoqatës mori vendim që greva për mosqarkullim të transportit rrugor të udhëtarëve të vazhdojë edhe nesër, ndërsa të premten të gjithë operatorët e transportit do të defilojnë me autobus në Prishtinë në shenjë pakënaqësie për mosrealizimin e marrëveshjes me qeverinë për subvencionim të humbjeve ekonomike që kanë pasur operatorët e transportit publik.