Kompania mëmë e Google Alphabet raportoi rritje dukshëm më të dobët të të ardhurave në tremujorin e tretë, duke përmendur një rënie të të ardhurave nga reklamat në YouTube për shkak të reduktimit të shpenzimeve të korporatave mes një ekonomie të ngadalësuar.
Të ardhurat e Alphabet u rritën gjashtë për qind në tremujorin e tretë, në 69.1 miliardë dollarë. Në tremujorin e mëparshëm, ajo ishte rritur me 13 për qind.
Fitimi neto në periudhën në fund të shtatorit ra me 26.5 për qind, në 13.9 miliardë dollarë.
Të ardhurat nga reklamat në YouTube u ulën me 1.4 për qind, në 7.1 miliardë dollarë.
Reklamat e Google sollën të ardhura të Alphabet prej 54.5 miliardë dollarësh, 2.4 për qind më shumë nga e njëjta periudhë e vitit të kaluar. Në tremujorin e dytë u rrit me 11.6 për qind.
Alphabet ka paralajmëruar se reklamuesit po shkurtojnë shpenzimet në YouTube, duke shtuar se do të punësojë gjysmën e numrit të punëtorëve sa kishte planifikuar për shkak të reduktimit të shpenzimeve në shërbimet financiare të Google.
Alphabet veçon kompanitë në sektorin e shërbimeve financiare, si sigurimet, kreditë hipotekore dhe kriptovalutat, ndër grupin që ka shkurtuar shpenzimet për reklama.
Të ardhurat e Google nga reklamat u mbështetën nga reklamuesit në sektorët e udhëtimit dhe shitjes me pakicë.
Një pikë e ndritshme ishte rritja e të ardhurave në Google Cloud, me 38 për qind, në 6.9 miliardë dollarë.
Rritja më e dobët e të ardhurave nga reklamat i dha një goditje pritjeve që Google, platforma më e madhe e reklamave digjitale në botë sipas pjesës së tregut, do të mbetej e padëmtuar nga ngadalësimi i aktivitetit ekonomik.