Telekomi i Kosovës është duke u përballur sot nga mëngjesi me sulme kibernetike, ku për pasojë kanë rënë edhe shërbimet e internetit.
Lajmin e ka konfirmuar zëdhënësi i kompanisë Telekomit të Kosovës, Fadil Lepaja.
Zëdhënësi Lepaja ka thënë se sulmi ka filluar prej orës 08:00 të mëngjesit dhe se ekipet e Telekomit kanë identifikuar IP-të që po sulmohen.
“Telekomi i Kosovës sot është duke u ballafaquar me sulme kibernetike. Sulmi ka filluar në orën 8 të mëngjesit. Ekipet tona i kanë identifikuar IP-të që po sulmojnë dhe janë duke u marrë intensivisht me parandalimin përfundimtar të sulmit. Do të ju mbajmë të informuar”, tha Lepaja.
Ndërsa Posta e Kosovës është funksionale në të gjitha zyrat postare dhe nuk ka pasur ndërprerje nga ndonjë sulm kibernetik eventual.
“Sa i përket rrjetit tonë gjithçka është stabile dhe nën kontroll”, njofton Posta e Kosovës.
Qeveria e Kosovës ka njoftuar të martën, se gjatë javës së kaluar, në periudha të caktuara kohore, sistemet qeveritare janë ballafaquar me sulme kibernetik të llojit DDoS që kanë shkaktuar pengesa të herëpashershme në shërbimin e internetit brenda institucioneve qeveritare dhe mungesë të herëpashershme të qasjes në disa shërbime.
Përmes një postimi në Facebook të Qeverisë, thuhet se gjatë periudhave të sulmit, ekipi i sigurisë kibernetike në ASHI është angazhuar maksimalisht që impakti i sulmit në qasshmërinë dhe funksionalitetin e shërbimeve të jetë sa më i vogël.
“Në bashkëpunim me ekspertët e jashtëm, me aplikimin e masave adekuate, sulmi kibernetik është tejkaluar dhe janë parandaluar tentativat për vazhdim të sulmit. Të gjitha shërbimet qeveritare janë plotësisht të qasshme dhe nuk ka pengesa në funksionimin e tyre. Gjatë këtij sulmi kibernetik në asnjë moment nuk janë cenuar të dhënat e ruajtura në Qendrën Shtetërore të të Dhënave në kuadër të Institucioneve të Republikës së Kosovës”, thuhet në njoftim.