Shtetet e Bashkuara të Amerikës kanë përgëzuar Kosovën dhe Izraelin për formalizmin e raporteve diplomatike.
Zëdhënësi i Departamentit të Shtetit, Ned Price, tha se kur partnerët janë të bashkuar, Shtetet e Bashkuara janë më të forta. Ai gjithashtu u zotua se Amerika do të qëndrojë krah Kosovës në rrugën e saj euroatlantike.
“Shtetet e Bashkuara të Amerikës përgëzojnë Izraelin dhe Kosovën për formalizmin e raporteve diplomatike. Kjo ditë ishte historike. Lidhjet më të thella ndërkombëtare ndihmojnë në promovimin e paqes dhe prosperitetit për të dy rajonet. Kur partnerët tonë janë të bashkuar, SHBA është e fortë. Amerika do t’i qëndrojë në krah Kosovës derisa vazhdon të lëvizë përpara drejt rrugës euro-atlantike”, ka thënë Price.
Ndryshe nga Shtetet e Bashkuara, Bashkimi Evropian doli me deklarata ndryshe pas vendimit që Kosova të hap ambasadën në Jerusalem dhe jo në Tel Aviv, duke shprehur keqardhje.