Bazuar në raportin e Klinikës së Radiologjisë është zvogëluar lista e pritjes për raste ambulantore për Rezonancë Magnetike (MRI), në vetëm tre muaj e gjysmë, nga më shumë se një vit sa ishte më parë, përderisa për pacientët e shtrirë në klinika, nuk ka fare listë të pritjes. Bazuar në raportin 9- mujor të punës, në Klinikën e Radiologjisë janë kryer 9 mijë e 683 Rezonanca Magnetike, 23 mijë e 751 pacientë në Tomografi të Kompjuterizuar (CT).
Sipas QKUK-së, brenda muajit, në Klinikën e Radiologjisë, kryen 12 mijë e 500 deri në 14 mijë ekzaminime të ndryshme diagnostike për pacientët.
Qendra Klinike Universitare e Kosovës thekson se aktualisht ka në funksion tri Rezonanca Magnetike, gjë që ka mundësuar që të bëhet reduktimi i listave të pritjes. Këtë reduktim e ka ndihmuar edhe instalimi i aparatit të Rezonancës Magnetike në Spitalin e Pejës.