Shkencëtarët kanë gjetur paraardhësin më të vjetër të njohur të oktapodëve – një fosil afërsisht 330 milionë vjeçar i zbuluar në Montana.
Studiuesit arritën në përfundimin se krijesa e lashtë jetoi miliona vjet më herët sesa besohej më parë, që do të thotë se oktapodët e kishin origjinën përpara epokës së dinozaurëve.
Fosili 12 centimetra i gjatë ka 10 gjymtyrë – oktapodët modernë kanë tetë – secila me dy rreshta thithës. Ai mund të ketë jetuar në një gji të cekët të oqeanit tropikal.
“Është shumë e rrallë të gjesh fosile të indeve të buta, përveç në disa vende”, tha Mike Vecchione, një zoolog pranë Muzeut Kombëtar Smithsonian të Historisë Natyrore, i cili nuk ishte i përfshirë në studim.
“Ky është një zbulim shumë emocionues. Ai e shtyn mbrapsht prejardhjen shumë më larg se sa dihej më parë”.
Mostra u zbulua në formacionin gëlqeror të Bear Gulch të Montana-s dhe iu dhurua Muzeut Mbretëror të Ontarios në Kanada në vitin 1988.
Për dekada të tëra, fosili mbeti i anashkaluar në një sirtar ndërsa shkencëtarët studiuan peshkaqenë fosile dhe gjetje të tjera nga vendi. Por më pas paleontologët vunë re 10 gjymtyrët e vogla të mbështjella me gur gëlqeror.
Fosili i ruajtur mirë “tregon gjithashtu disa prova të një qese ngjyre”, e përdorur ndoshta për të nxjerrë jashtë një mantel të errët të lëngshëm për të ndihmuar në shmangien e grabitqarëve, ashtu si oktapodët modernë, tha Christopher Whalen, një paleontolog pranë Muzeut Amerikan të Historisë Natyrore dhe bashkautor i studimit të botuar në revistën “Nature Communications”.
Krijesa ka të ngjarë të jetë paraardhësi i oktapodëve modernë dhe kallamarëve vampirë, një krijesë detare e quajtur në mënyrë konfuze që është shumë më afër një oktapodi sesa një kallamar. Më parë, “vampiropodi” më i vjetër i njohur ishte rreth 240 milionë vjet më parë, thanë autorët.