Presidentja e Kosovës, Vjosa Osmani- Sadriu priti në takim ambasadorin jorezident të Japonisë në Kosovë, Akira Mizutani, me ç’rast kanë biseduar për thellimin e bashkëpunimit mes dy vendeve.
Presidentja e ka falënderuar ambasadorin Mizutani për mbështetjen e deritashme japoneze ndaj Kosovës, përfshirë rritjen e numrit të bursave për studentët kosovarë nga qeveria japoneze, si rezultat i diskutimeve gjatë vizitës së në Tokio vitin e kaluar, thuhet në komunikatë për media.
“Kosova dhe Japonia ndajnë vlerat dhe parimet e njëjta në marrëdhëniet ndërkombëtare dhe çështjet botërore, prandaj presim bashkëpunim edhe më të gjerë edhe ne sfera të tjera“, ka thënë Osmani.
Ambasadori Mizutani vlerësoi qëndrimin e institucioneve të Republikës së Kosovës karshi luftës së paprovokuar të Rusisë në Ukrainë me sanksione kundër Rusisë, si dhe qëndrimin stoik me popullin ukrainas, duke thënë se demokracitë duhet të qëndrojnë të bashkuara.
Në vazhdën e mbështetjes japoneze, organizata japoneze JICA, i ka dhuruar komunave të Kosovës një donacion me kamionë të mbeturinave, teksa Japonia nëpërmjet kësaj organizate vazhdon të implementojë dhjetëra projekte në fushën e arsimit dhe mjedisit.
Osmani ka kërkuar vazhdimin e përkrahjes nga Japonia për procesin e anëtarësimit të Kosovës në organizata ndërkombëtare.