Në kuadër të përgatitjes për organizimin e zgjedhjeve lokale, Komisioni Qendror i Zgjedhjeve (KQZ), nesër do të fillojë regjistrimin e aplikimeve për gjithë votuesit nga jashtë Kosovës që dëshirojnë të marrin pjesë në zgjedhjet e 17 tetorit të këtij viti.
Këtë e bëri të ditur, kryeshefi i sekretariatit të KQZ-së, Burim Ahmetaj në mbledhjen e sotme të KQZ-së.
“Operacioni që është duke përgatitur sekretariati është ai përmes postës, kur edhe është periudha e aplikimit për t’u regjistruar si votues nga jashtë vendit. Sekretariati ka identifikuar të gjitha e-mail adresat e të gjithë votuesve që kanë qenë të aprovuara në zgjedhjet e 14 shkurtit. Të njëjtëve do t’i dërgoj e-mail adresë për të konfirmuar a dëshirojnë të marrin pjesë në zgjedhje… Nesër me datë 10 korrik mendojmë të fillojmë në operacionin përmes postës”, tha ai.
Ishte pikërisht kjo pikë që nxiti debat dhe përplasje ndërmjet vet anëtarëve të KQZ-së.
Anëtari i Lëvizjes Vetëvendosje, Sami Kurteshi duke kërkuar sqarime shtesë për regjistrimin e aplikimeve të votuesve nga jashtë Kosovës, u përplasë verbalisht me anëtarin e PDK-së në KQZ, Arianit Elashani. Kurteshi disa herë i tha të njëjtën të mos i ndërhyjë gjatë fjalimit të tij, derisa shkëmbyen edhe kritika ndaj njëri-tjetrit.
“Po mirë pse po e sqaron ti kur unë jam këtu duke diskutuar për një çështje. Jo ma mirë nuk mundesh me sqaru…a është e mundur mos me ndërhy. Nëse ndryjnë nuk e sqaron, nëse e njeh aspektin teknik shumë ma mirë se unë, tash do ta tregosh. Çështja e tretë është nëse ke fjalor shumë më të pasur me 20000 mijë fjalë, e unë i përdorë vetëm 3000 fjalë atëherë është çështje tjetër. Mos bre, se nuk e ki as përvojën dhe as njohurin me konstatu të tilla, mos allahile mos ndërprejë”, u shpreh Kurteshi.
Lidhur me përplasjet e vazhdueshme në këtë institucion zgjedhor, kryesuesi i KQZ-së, Kreshnik Radoniqi tha se telashet ndërmjet veti anëtarët e KQZ-së duhet t’i zgjidhin dhe mos të bëjnë debate të kota.
“Gjithçka është e shkruar në rregullore dhe nuk po di pse po tejkalohet rregulloja në funksionimin e (KQZ). Nëse kemi telashe ju ndaj njëri-tjetrin, ajo është çështje e juaja, kapni rregulloni, nuk është çështje e imja brenda atyre këshillave. Por është e rëndësishme qysh ju e rregulloni rregulloren. Sa i përket juve zotëri Rama që nuk iu dhashë fjalën për replikë është se nuk desha të bëjmë debate të kota për t’ia filluar ju përlarjen këtu pa nevojë”, theksoi ai.
Në këtë mbledhje të KQZ-së u bë e ditur se edhe Lista Guxo, si iniciativë qytetare ka aplikuar për certifikim në zgjedhjet për asamble komunale në Ferizaj.
“Deri më tani kemi pranuar tri aplikime për certifikim të subjekteve politike. Prej tyre partia politike e regjistruar Lëvizja qytetare Vatra ka aplikuar për certifikim në pjesëmarrje për zgjedhjet në kryetar komune dhe asamble komunale. Aplikimi tjetër është kandidati i pavarur për komunën e Kaçanikut dhe aplikimi i fundit është Iniciativa Guxo që ka aplikuar për certifikim për pjesëmarrje për zgjedhjet në kuvend komunal në komunën e Ferizajt”, tha Vesa Xharra nga Zyra për Regjistrim dhe Certifikim në mbledhjen e sotme të KQZ-së.
Krahas kësaj, në mbledhjen e sotme u miratuan edhe të gjitha qendrat e votimit që do të jenë në zgjedhjet e 17 shkurtit.