Presidenti francez Emmanuel Macron premtoi sot një ndihmë prej 125 milionë eurosh për Ukrainën.
Duke folur në një konferencë donatorësh për Ukrainën, Macron tha se vendi i tij ka dhënë tashmë 151.5 milionë euro ndihmë për Ukrainën që nga fillimi i luftës midis Moskës dhe Kievit në shkurt.
Duke përshëndetur “trimërinë dhe vendosmërinë” e Ukrainës, presidenti francez tha se konferenca është “dëshmi e prekshme që Ukraina nuk është e vetme”.
Ai tha se Rusia dëshiron të thyejë rezistencën e popullit ukrainas duke synuar infrastrukturën civile, duke shtuar se ato sulme përbëjnë “krime lufte”.
Ai njoftoi një paketë shtesë mbështetëse prej 125 milionë eurosh – 48.5 milionë euro për çështjet humanitare dhe 76.5 milionë euro për nevojat e energjisë.
Presidenti francez tha se do të zbatohet gjithashtu një mekanizëm koordinues i përforcuar për ndihmën ndërkombëtare për Ukrainën.
“Ky mekanizëm, i fokusuar në ndihmën emergjente, plotëson koordinimin e ndihmës energjetike të promovuar nga SHBA në G-7 dhe mekanizmin e rindërtimit që ne e bëmë të qartë nën presidencën gjermane të G-7”, tha Macron.
Duke theksuar rëndësinë e rindërtimit të Ukrainës pas luftës, Macron tha se sot pasdite do të mbahet një forum ekonomik ku do të marrin pjesë kryeministri ukrainas Denys Shmyhal dhe pothuajse 700 kompani./AA