Dorëheqjet e serbëve në institucionet e Republikës së Kosovës kanë vijuar edhe sot. Siç bëhet e ditur, katër zyrtarë të Komisionit Qendror të Zgjedhjeve të angazhuar në komunat veriore kanë dhënë dorëheqje.
Zëdhënësi i KQZ-së, Valmir Elezi, tha se tashmë kanë pranuar njoftimin për dorëheqje.
“Komisioni Qendror i Zgjedhjeve ka pranuar njoftimin për dorëheqje të 4 zyrtarëve komunalë të Zgjedhjeve në komunat: Mitrovicë e Veriut, Zveçan, Zubin Potok dhe Leposaviq. KQZ-ja do ta trajtojë këtë çështje dhe do t’iu mbajmë të informuar”, ka thënë ai.
Dorëheqjet e serbëve nga institucionet e Republikës së Kosovës kanë ardhur pas vendimit të Listës Serbe. Siç është raportuar në media, shumica prej këtyre dorëqjeve nuk janë akt indidivual i të dorëhequrve por si pasojë e presionit të strukturave ilegale në veri të vendit.
Një punonjëse e Gjykatës Themelore në Mitrovicë dëshmoi një ditë më parë se ishte detyruar të japë dorëheqje pas 20 vitesh shërbimi.