Sipas një hulumtimi publikuar së fundmi, njerëzit mund të reduktojnë rrezikun e vdekjes së parakohshme me 20%, vetëm duke ngrënë më shumë ushqime nga katër grupet e piramidës ushqimore, ku përfshihen drithëra, fruta, perime, arra dhe bishtajore.
Në mënyrë të veçantë, studimi zbuloi se njerëzit që ndoqën më nga afër ndonjë nga modelet e rekomanduara të të ushqyerit të shëndetshëm, të cilat përfshijnë ngrënien e më shumë drithërave, frutave, perimeve, arra dhe bishtajore, kishin gjithashtu më pak gjasa të vdisnin nga kanceri, sëmundjet kardiovaskulare dhe respiratore dhe neurodegjenerative.
“Njerëzit shpesh mërziten duke ndjekur një mënyrë të caktuar të të ushqyerit”, ka thënë bashkëautori i studimit Dr. Frank Hu, një nutricionist dhe epidemiolog dhe kryetar i Departamentit të Ushqyerjes në Shkollën e Shëndetit Publik në Harvard Chan, ndërsa shton se “Pra, ky është një lajm i mirë. Kjo do të thotë se ne kemi më shumë fleksibilitet në krijimin e modeleve tona të të ushqyerit të shëndetshëm që mund të përshtaten me preferencat individuale dietike , kushtet shëndetësore dhe kulturat e secilit” .
Studimi 36-vjeçar shqyrtoi zakonet e të ngrënit të 75 mijë grave që morën pjesë në studimin e shëndetit të infermierëve dhe më shumë se 44 mijë burrave që morën pjesë në studimin vijues të profesionistëve shëndetësore. Përfundimi tregoi se asnjë nga të anketuarit nuk kishte sëmundje kardiovaskulare në fillim të studimit dhe pak ishin duhanpirës.
Ky ishte një nga studimet më të mëdha dhe më të gjata të grupit për të parë modelet dietike dhe rrezikun afatgjatë të vdekjes së parakohshme dhe vdekjes nga sëmundjet e mëdha.