Britania e Madhe vendosi sot sanksione ndaj 12 komandantëve ushtarakë rusë, të cilët thotë se janë të përfshirë në sulmet me raketa në qytetet ukrainase, si dhe biznesmenë iranianë, të cilët i akuzon se janë të përfshirë në prodhimin dhe furnizimin e dronëve ushtarakë të përdorur në sulmet ruse në Ukrainë.
“Sulmet e llogaritura nga forcat ruse ndaj qyteteve dhe civilëve të pafajshëm në Ukrainë nuk do të mbeten pa përgjigje”, tha sekretari i Jashtëm britanik, James Cleverly.
Cleverly tha gjithashtu se regjimi iranian po izolohet gjithnjë e më shumë dhe po përballet me thirrje për ndryshim nga njerëzit e tij dhe po bën, siç tha ai, “marrëveshje të pista me (presidentin rus Vladimir) Putin në një përpjekje të dëshpëruar për të mbijetuar”.
Britania pretendon, duke cituar inteligjencën amerikane, se dronët e prodhuar nga Irani kanë luajtur një rol qendror në sulmet ndaj civilëve në Ukrainë.
Teherani dhe Moska kanë hedhur poshtë akuzat perëndimore se Rusia po përdor dronët iranianë për të sulmuar objektivat në Ukrainë.