Shefi i Shtabit të Përgjithshëm të Forcave të Armatosura, Gjeneral Brigade, Arben Kingji u betua sot para Presidentit të Republikës, Bajram Begaj, njëkohësisht edhe Komandant i Forcave të Armatosura të Republikës së Shqipërisë.
Në ceremoninë e betimit, pas ekzekutimit të himnit kombëtar, u lexua dekreti i emërimit të Presidentit të Republikës. Gjeneral brigade Arben Kingji, me dorën mbi Kushtetutë, u betua solemnisht se “Do t’i bindem Kushtetutës dhe ligjeve në fuqi, do t’i shërbej me ndershmëri vendit tim dhe do të mbroj interesat e Republikës së Shqipërisë.”
Presidenti Begaj i dorëzoi dekretin e emërimit dhe i uroi Shefit të Shtabit të Përgjithshëm, Kingjit, punë të mbarë dhe suksese në detyrën e rëndësishme në krye të Forcave të Armatosura shqiptare./ATSH/