Pas takimit me presidenten Vjosa Osmani, presidenti i Shqipërisë Bajram Begaj ka thënë se Shqipëria në Këshillin e Sigurimit të OKB-së do të jetë zëdhënëse e interesave të Kosovës. Ai gjithashtu ka thënë se Ushtria Çlirimtare e Kosovës është pjesë e ndritur e historisë së shqiptarëve dhe asnjë raport i trilluar nuk do të arrijë të zbeh diçka të tillë.
“Së bashku fituam luftën, bashkë duhet të luftojmë për të ruajtur paqen. UÇK përbën faqe të ndritur të historisë sonë të përbashkët që e bënë krenar çdo shqiptar. Asnjë raport i trilluar nuk do të arrijë kurrë të zbeh këtë trashëgimi të lavdishme”, deklaroi ai.
Ai ka thënë se hapja e negociatave të Shqipërisë është arritje e shumëpritur dhe sipas tij lajm i mirë edhe për Kosovën dhe rajonin.
“Liberalizmi i vizave për Kosovën është premtim i vonuar dhe një e drejtë që ata duhet ta gëzojnë, për të cilën sigurova presidenten që Shqipëria do të vijojë me mbështetjen e saj. Mbështesim anëtarësimin e Kosovës në të gjithë organizmat ndërkombëtar. Gjatë mandatit në Këshillin e Sigurimit Shqipëria do të jetë zëdhënëse e interesave të Kosovës, për të promovuar shtetin e pavarur të Kosovës. Mbështes plotësisht të drejtën e saj legjitime për shtrirjen e autoritetit dhe vendosjen sundimit të ligjit në veri të vendit. Realiteti i Kosovës së pavarur është i pakthyeshëm”, ka thënë Begaj.