Grusht shteti në Sudan ka shkaktuar shqetësim të madh në botë dhe një valë kritikash.
Sekretari i Përgjithshëm i OKB-së, Antonio Guterres ka bërë thirrje për lirimin e menjëhershëm të kryeministrit sudanez dhe të gjithë zyrtarëve të tjerë të arrestuar.
“Karta kushtetuese duhet të respektohet plotësisht për të mbrojtur tranzicionin politik të fituar me vështirësi”, tha ai në Twitter.
I dërguari i posaçëm i OKB-së në Sudan, Volker Perthes, iu bashkua thirrjes, duke thënë se arrestimi i zyrtarëve sudanezë ishte i papranueshëm.
Liga Arabe ka bërë thirrje për dialog dhe respektim të marrëveshjes për ndarjen e pushtetit gjatë tranzicionit të vitit 2019, pas përmbysjes së autokratit Omar al-Bashir, sipas sekretarit të Përgjithshëm Ahmed Abul Gheit.
Presidenti i Komisionit të Bashkimit Afrikan, Mosa Faki bëri thirrje për një rifillim të menjëhershëm të dialogut midis civilëve dhe ushtrisë që ndajnë pushtetin.
Shqetësime u shprehën edhe nga Shtetet e Bashkuara, i dërguari i posaçëm i së cilës për Bririn e Afrikës, Jeffrey Feltman, pati një takim të dielën me kryeministrin sudanez, Abdallah Hamdok, i cili tani është në paraburgim, duke paralajmëruar se një ndryshim i qeverisë kalimtare do të rrezikonte ndihmën e SHBA.
Komisioni Evropian ka bërë thirrje për lirimin e menjëhershëm të anëtarëve civilë të qeverisë sudaneze dhe për ndërprerjen e kanaleve të komunikimit në mënyrë që ata që kanë nevojë të mund të ndihmohen.
Ministri i Jashtëm evropian, Josep Borrell, i bëri thirrje komunitetit ndërkombëtar që “të kthejë tranzicionin sudanez në rrugën e duhur”. Borrell bëri thirrje për lirimin e menjëhershëm të zyrtarëve të ndaluar ilegalisht dhe tha se e drejta për protestë paqësore duhet respektuar dhe se dhuna dhe gjakderdhja duhet të shmanget me çdo kusht.
“Veprimet e ushtrisë janë një tradhti ndaj revolucionit, tranzicionit dhe kërkesave legjitime të popullit sudanez për paqe, drejtësi dhe zhvillim ekonomik,” tha ai.
Dënimeve të grusht-shtetit iu bashkua edhe Gjermania, duke bërë thirrje për vazhdimin e një “tranzicioni politik paqësor drejt demokracisë” dhe një “dialog” të liderëve politikë, sipas ministrit të Jashtëm gjerman, Heiko Maas.
Mbështetje për qeverinë kalimtare sudaneze shprehu edhe presidenti francez Emmanuel Macron, i cili bëri thirrje për lirimin e menjëhershëm të kryeministrit të arrestuar dhe liderëve të tjerë.
Britania tha se grushti ushtarak në Sudan ishte “një tradhti e papranueshme e popullit sudanez dhe tranzicionit të tyre demokratik”.
“Forcat e sigurisë duhet të lirojnë kryeministrin Hamdok dhe liderë të tjerë civilë dhe ata që nuk respektojnë të drejtën për të protestuar pa frikën e dhunës do të përgjigjen”, shkroi në Twitter ministrja britanike për Afrikë, Vicky Ford.