Profesionistët gjermanë të shëndetësisë organizuan protesta në qytete të ndryshme të mërkurën, duke kërkuar më shumë fonde për spitalet.
Në Berlin, disa qindra protestues morën pjesë në tubimin e organizuar nga Federata Gjermane e Spitaleve, duke protestuar kundër planeve të qeverisë për reformën shëndetësore dhe masave shtrënguese.
Kryetari i federatës, Gerald Gass, tha për Anadolu se spitalet mund të përballen me një valë falimentimesh në muajt e ardhshëm për shkak të problemeve financiare.
“Spitalet janë në një situatë dramatike ekonomike për momentin, ne kemi nevojë urgjente për kushte të drejta financimi. Vetëm kështu mund të sigurohemi që spitalet në Gjermani të mos mbyllen dhe të jemi në gjendje të kujdesemi për pacientët pa ndërprerje”, tha ai.
Gass tha se në gjysmën e parë të këtij viti, më shumë se 50 spitale u paraqitën për falimentim, dy herë më shumë se në të njëjtën periudhë të vitit të kaluar.
Gjatë tubimit në Berlin, profesionistët e shëndetësisë kënduan slogane kundër kancelarit Olaf Scholz, ministrit të financave Christian Lindner dhe ministrit të shëndetësisë Karl Lauterbach.
Ata mbanin pankarta me mesazhe si “Lauterbach, Lindner, Scholz, zgjohuni”, “Stop mbylljes së spitaleve” dhe “Kushte të barabarta pune për të gjithë”.
Barbara Majd Amin, një protestuese, kritikoi qeverinë se ka shpenzuar miliarda për armatim, por nuk ka ndarë fondet e nevojshme për sektorin e shëndetësisë.
“Qeveria miratoi një fond special prej 100 miliardë eurosh për të blerë më shumë tanke dhe municione, por thotë se nuk do të mund të gjejë 10 miliardë euro për spitalet! Kjo duhet të protestohet nga të gjithë”, tha ajo./AA/