Qeveria amerikane po shqyrton një plan për prodhimin e përbashkët të armëve me Tajvanin, raportoi sot gazeta japoneze Nikkei, duke cituar tri burime.
Gazeta japoneze tha se Uashingtoni dëshiron të rrisë kapacitetin e prodhimit të armëve për SHBA-në dhe të përshpejtojë transferimin e tyre, si pjesë e hapave për të forcuar parandalimin e Kinës.
Raporti i Nikkei tha se një person me njohuri të drejtpërdrejta për diskutimet e qeverisë amerikane tha se diskutimet kishin filluar, ndërsa një burim tjetër tha se ato mund të kërkonin kohë.
Siç shton gazeta, mundësitë do të përfshinin ofrimin e teknologjisë së SHBA-së për të prodhuar armë në Tajvan ose prodhimin e armëve në Shtetet e Bashkuara duke përdorur pjesë tajvaneze.
Presidenti kinez Xi Jinping tha të dielën se i takon popullit kinez të vendosë për çështjen e Tajvanit dhe se Kina kurrë nuk do të heqë dorë për të përdorur forcën, por gjithashtu theksoi se do të përpiqet për një zgjidhje paqësore të problemit.
Zyra e Presidentit në Taipei tha në fillim të kësaj jave se Tajvani nuk do të heqë dorë nga sovraniteti i tij dhe nuk do të bëjë kompromis me lirinë dhe demokracinë.