Një zjarr ka përfshirë qendrën tregtare “Viva Fresh Store” në Ferizaj. Fatmirësisht nga ky zjarr nuk ka të lënduar konfirmoi zëdhënësi i Policisë së Kosovës për Rajonin e Ferizajt, Kanun Veseli.
Veseli tregoi për se ngjarja ka ndodhur pak pas mesnatës, ku edhe kanë ndërhyrë policia, zjarrfikësit e ambulancat.
“Policia ka pranuar informacionin rreth orës 00:11, se qendra tregtare ‘Viva Fresh’ ishte kapluar nga zjarri. Ekipet e Policisë, zjarrfikësit dhe ambulanca kanë dalë në vend të ngjarjes. Për shuarjen e zjarrit janë angazhuar zjarrfikës të Ferizajt, Shtimes, Kaçanikut, Lipjanit, Gjilanit, Vitisë, Kamenicës dhe Prishtinës meqenëse zjarri ka qenë i madh”, tha ai për KosovaPress.
Veseli thotë se ende nuk dihen shkaqet që çuan deri te zjarri në këtë qendër.
“Për shkaqet se si ka ardhur deri te zjarri, ekipet e Policisë hetimet lidhur me zjarrin dalin më vonë, dmth është në proces të hetimit. Nuk ka pasur të lënduar dhe as punëtorë brenda pasi që ngjarja ka ndodhur në ora 00:11”, tregoi Veseli.